ھِيءَ ھوا تنھنجي، حُسن جي ھاڪ ۾

ھِيءَ ھوا تنھنجي، حُسن جي ھاڪ ۾،
پَئِي ڦِري ھر ٿام ۾ ۽ ٿاڪ ۾.
تون وسِين خوشبوءَ ۾، سُرھاڻ ۾،
باک ويلي، مھڪ گُھلندي ماڪ ۾.
تون نہ موٽئين، مون نہ سُودي نِنڊ ڪا،
نيڻ ڏِيئن جِيئن ٻَريا پئي تاڪ ۾.
مان بہ ڪافر، بُت اچي تنھنجو رکيم،
اڄ وري دل پنھنجي ڪعبي پاڪ ۾.
سِج، سرمد ۽ ننڍڙا ٻارڙا،
سڀ اگهاڙپ جي ڍڪيل پوشاڪ ۾.
ھي ”حسن“ آوارہ گرد آدمي،
تو ڏٺو آ ڇا ڀلا رولاڪ ۾؟
اهم معلومات ۽ تفصيل
- صنف
- ghazal
- شاعر
- حسن درس
موضوع
- ڏُک
- تڙپ
- رُوحاني صفر
- حُسن